Manera ser humano ku nos ta, nos tur lo pasa den momentunan ku lo dal nos hopi duru. Por ta bo no a sper’é, por ta bo no a kere algu asina por a pasabu, por ta bo no a ni pensa riba esei, pero bida ta asina i nos tur —sin importa ken òf ki tipo di persona nos ta— lo pasa den situashonnan difisil. Por ta abo ta den unu aworaki, i bo ta pensa ku e no tin un fin. Dilanti di bo wowonan, tur kos ta sukú sukú, sin salida. I bo dianan ta yená di amargura i tristesa.
Den di bo, bo no ta sinti ku bo tin balor mas, nisikiera bo no por ni maginá un bida alegre ni un futuro prospero. Bo ta hiba un karga riba bo skoudernan hopi pisá: esun di kana ku un sonrisa briyante dilanti tur hende ku bo topa, pero den soledat bo ta kita e maskara i awa so ta kai for di bo wowonan. Tempu a kuminsá pasa i den bo desesperashon, pensamentunan di morto a kuminsá rondoná bo kabes.
Si, esaki ta masomenos loke lo bo haña den un karta di HELP trahá ku hopi amor.
Pero kiko ta HELP? Un proyekto ku ta desafiá i lucha kontra depreshon, suisidio, pensamentunan negativo, tristesa i más, kompletamente gratis.
Nos ta dediká pa yudabu, dunando bo e man pa hala bu for di e buraku sukú kaminda bo ta. Si bo a topa e pagina òf post aki, no ta koinsidensia, tin un fin pa bo doló! Nos no lo eksponé bu, no tene berguensa, e dolor ei por kaba awe mes!
Dios a duna Su Uniko Yu pa salba nos. Bo sa kon e dolor di pèrdè un yu ta? Ba yeg’i wak un mama yorando deskonsolá i destruí kompletu? Pero Dios a hasi’é, El a duna Señor Hesus, kende a muri i karga ku e dolor ei, ku e tristesa ei, ku tur eseinan, pa awe, bo por biba un bida alegre den abundansia. Por ta esaki no a konvensé bu ainda, por ta bo no ta kere mi, pero mi por bisa bu sigur, pidi yudansa na Dios ta e mihó desishon ku bo por tuma. Ata bo a purba tur kos kaba! Purba ku Señor Hesus awor, E si no ta defraudá, nunka!
Bo historia por kambia, bo por bolbe soña, bo por bolbe biba!
Purba i mira ki bon SEÑOR ta, FELIS t’esun ku ta skonde serka djE.
Salmo 34:8
Felis esnan ku ta TRISTU; Dios lo KONSOLÁ nan.
Mateo 5:4
Tuma kontakto ku nos via:
• Facebook: FHU Kòrsou
Nos ta keda na:
• Winston churchillweg 161, Sta. Maria
• Fokkerweg 66, Saliña
• Weto 22 B (Weto-Montaña)
