“I e konseho tabata bon den bista di Farao i den bista di tur su sirbidónan. E ora ei Farao a bisa su sirbidónan: “Nos por haña un hòmber manera esaki, ku tin e Spiritu di Dios den djé?” Pesei Farao a bisa Jozef: “Komo ku Dios a mustrabo tur esaki, no tin ningun hende ku disernimentu i sabiduria manera abo. Abo lo ta hefe di mi kas, i segun bo òrdu henter mi pueblo lo wòrdu goberná; solamente riba trono lo mi ta mas grandi ku bo.”
Genesis 41:37-40
Na momentu ku nos tin e Spiritu di Dios den nos, ni maske kuantu inhustisia nos sufri esei no ta kambia e esensia di ken nos ta. Jozef a wòrdu skohe pa Dios i ni maske kuantu kos e la pasa aden semper Dios tabata kune. Maske e la wòrdu bende inhustamente pa su rumannan, semper e la keda ku un kurason hustu i rekto dilanti di Dios. Esei a pone ku den tur loke e tabata hasi Dios semper a bendishon’e.
Nos tur por sufri inhustisia den bida, pero loke ta hasi diferensha ta kon nos lo reakshona. Si nos lo mantene nos mes fiel na Dios i konfia den Su hustisia òf si nos lo buska e hustisia ku nos propio mannan.
Buska e Spiritu di Dios, e lo dunabu sabiduria i disernimentu.
