Kiko ta nifiká asumí nos fe?
Ora nos asumí nos fe nos ta rekonosé ku Kristu Hesus ta nos uniko Señor i Salbadó! Ora nos rekonosé ku sin e forsa di Dios nos no ta nada i ora nos entregá nos bida den e man Di Dios. Ora nos pone nos konfiansa den Dios! Tur eseinan ta ehèmpelnan di asumí nos fe.
Ora Elias a haña e forsa di Dios e por a lucha pa 40 dia i
40 anochi sin kansa sin drumi pasó Dios no a bandon’e, maske ku el a haña un menasa di morto.
“Awor Akab a konta Jezabel tur loke Elias a hasi, i kon el a mata tur e profetanan ku spada. E ora ei Jezabel a manda un mensahero serka Elias, bisando: “Ku e diosnan hasi asina ku mi i pió ainda, si mañan na e ora aki mi no hasi bo bida manera bida di un di nan.” I Elias a haña miedu i a lanta hui bai pa skapa su bida i a yega Beerseba, ku ta pertenesé na Huda, i a laga su sirbidó ayanan. Ma e mes a hasi un biahe di un dia den desierto, i a bai sinta bou di un mata di enebro; i el a pidi pa e muri, i a bisa: “Ta basta; awor, O SEÑOR, tuma mi bida, pasobra mi no ta mihó ku mi tatanan.” I el a kai drumi bou di un mata di enebro i a pega soño; i mira, tabatin un angel ta mishi kuné, i el a bis’é: “Lanta i kome.” E ora ei el a wak, i mira, na su kabes tabatin un pan buskuchi trahá riba piedra kayente, i un butishi di awa. Asina el a kome i bebe, i a kai drumi atrobe. I e Angel di SEÑOR a bolbe bin pa di dos biaha, a mishi kuné i a bisa: “Lanta i kome, pasobra e biahe ta muchu largu pa bo.” Asina el a lanta i a kome i bebe, i den e forsa di e kuminda ei el a bai kuarenta dia i kuarenta nochi te ora ku el a yega Horèb, e seru di Dios.”
Elias a asumí su fe i pone su konfiansa den Dios. Maske ku el a haña un menasa pasó el a lucha pa su pueblo, el a sakrifiká na Dios un toro i hopi awa, ainda ku e pueblo tabata tin e skarsedat di awa, pero nan a entregá e awa i e toro ku konfiansa!
Si! Ku e konfiansa ku Dios ta bai kontestá, i Dios a kontestá tambe, mandando e kandela ku a kai for di shelu, kimando e toro i sekando e awa.
Sakrifisio ta ora bo hiba bo fe na un nivel máksimo, ora bo entregá na Dios loke di bèrdat ta hasi doló i ta bal la pena.
Maske ku diabel por purba pone duda, hopi konflikto, tranka i difikultatnan pa bo desistí, sa ku ta n’e momentu ei Dios ta bezeg ta mandando e angel ku e pan pa hasi bo fuerte! Pasó ta e awa i e pan di Dios so por duna bo e forsa ku bo mester.
Nos biahe ta largu, un biahe di lucha, momentunan difisil, pero tambe di viktoria ora nos asumí e fe.
Dikon Altar ta nesesario pa logra un enkuentro ku Dios? Pasó ta einan tin entrega pa un kambio di bida. Si bo ke kandela di shelu, bo tin ku lanta un altar pa Señor.
Elias a laga Dios sin opshon pa e solushon di su sakifrisio, i Dios a honra ku e kontesta.
Pasó ora di bèrdat bo entregá tur kos i tin un enkuentro ku Dios, Dios ta fiha su wowo riba bo i duna bo tur e kontestanan ku abo mester den tur area di bo bida.
