Nos no por kere den un Dios ku ta solamente na un “lugá haltu i sublime”, leu for di nos. Pero kere den e Dios ku, maske ta biba den haltura, e ta akinan tambe, ku esnan umilde i ku spiritu kibrá, manera E la bisa:
“Pasobra, asina Esun haltu i sublime, Kende ta biba pa semper, Kende Su nòmber ta Santu, ta bisa: “Mi ta biba den un lugá haltu i santu, i tambe huntu ku esnan umilde i di spiritu kibrá, pa rebibá spiritu di e hende kibrá i pa rebibá kurason di e humilde.”
Isaías 57:15
P’esei, na mes momentu, e Altísimo ta abitá den su tèmpel santu, pero tambe den e kurason humano ku risibiÉ.
Ki diferensia ta e dos bibiendanan aki! Miéntras un ta bunita, trankil, espasioso i santu, i e otro ta chikí, no semper bunita i ni semper agradabel.
Kada biaha nos ta deskubrí algu mahoso den nos kurason, no ta asina?
Pero, inkluso ku e kontraste aki, Dios a skohé pa biba den e dos bibiendanan aki. Asina aki so shelu ta uni ku tera i e kurason humano ku su Kreador.
Ke men, no pensa ku bo problemanan i e asuntunan chikitu den bo bida no ta importá e Todo Poderoso! Ta eksaktamente kontrali! Su mayor okupashon, revelá den e Eskrituranan, ta di kuida nos.
Prueba di esaki ta ku e Santu a baha den karni i sanger, pa medio di Señor Hesus. E enkarnashon di e Verbo a nifiká ku, esun mas haltu, eksaltá i eminente Señor, tabatin kompashon ku e sernan mas indigno, pober i mizerabel di universo.
P’esei, awe esun ku ta sintié kibrá, chikí, trapá dor di sufrimentu, machiká di kulpa i prezu dor di piká, esaki ta e momentu mas apropiá pa uni su mes den spiritu ku Dios i bolbe bira UN ku N’É.
No ser loko di pèrdè e privilegio èkstra ordinario aki.
