“Hesus a bisa nan: ‘Pasa rònt mundu i prediká e bon notisia na henter humanidat. Esun ku kere i batisá, lo ta salbá, ma esun ku no kere, lo ta kondená!”
Marko 16:15 – 16
E bon notisia, e evangelio, ta wòrdu prediká kada dia rondó di mundu. Pero ta bon pa enfatisá ku Hesus ta aklará akinan ku es ku kere i boutisá lo ta salbá.
Kiko e ‘kere’ aki ta enserá?
Ora nos ta kere (DI BÈRDAT) nos ta rekonosé nos pikánan i nos ta deseá profundamente di tin un bida diferente di esun ku nos a biba pa añanan largu. Ora nos kere di bèrdat, nos ta laga nos bida bieu atras i disidí biba un bida honrando Dios den kada sentido. Hopi hende ta pensa ku kere ta solamente “Mi ta kere den Dios, den Beibel” “Ang si, Dios ta eksistí si”, nò! E kere ku Hesus ta papia di dje aki nan ta e kere ku -mane nos a bisa- ta hasi bu laga tur kos atras pa sigui Dios kompletu, sin deseo mas di biba e bida bieu, pues bo sa ku esei tabata malu.
Esei ta hiba na e di dos stèp: ora bo rekonosé ku e bida ku bo tabata biba ta malu – desagradabel, deshonrabel pa Dios- bo ta arepentí, i ku e arepentimentu sinsero ta bin e deseo di boutisá.
E boutismo den awa ta representá e deramentu di e karni, di nos bida bieu. I na e momentu ei, nos ta pasa biba un bida nobo, nos ta kuminsá biba pa e Spiritu. Nos ta wòrdu limpiá i renová, pa asina por kuminsá buska e otro boutismo: e boutismo ku Spiritu Santu.
Pero, e base di tur esaki ta den e prinsipio di e versikulo: ‘kere’. Pues, si bo no kere di bèrdat, nunka lo bo boutisá den awa sinseramente ni tampoko risibí e boutismo ku Spiritu Santu, tur kos ta kuminsa den e ‘kere’ ei.
