Abo tin e garantia di tin e siguridat di e salbashon di bo alma? Bo tin sigur ku bo tin e garantia ku bo lo yega te sierto edat i ku ta ku e edat ei bo ta bai fayesé?
Nos ta hasi tur nos nesesidat òf responsabilidatnan diario ku nos ta lubidá riba loke ta mas importante: nos alma.
Nos alma si ta eterno i ta nos mes ta disidí unda nos alma lo pasa eternamente. Maske ku tin hende ku ta pensa òf bisa ku ta shelu so ta eksistí i ku tur hende ta destiná pa bai shelu, esei no ta bèrdat, pues Dios i malu ta eksistí.
Kemen, si bo skohe malu, bo’n por ta ku Dios! I si bo skohe Dios, bo no por ta ku malu!
P’esei, ken ta bo Dios?
E pueblo di Isreal i nos tambe awendia a mira hopi gloria di Dios. Niun persona den religion òf kreensianan ku ta sirbi diosnan falsu no ta kambia nan dios, i dikon abo si ta kambia bo Dios? Bo ta kambi’E pa bo mama òf tata, por ta pa bo yu, pa bo trabou, pa bo kasá, pa un familiar, pa sèn. Sinseramente, ken bo a hasi e dios di bo bida? ken bo tin na promé lugá?
“I a sosodé ku despues di un tempu e roi a seka, pasobra awaseru no a kai na e tera. 8. E ora ei e palabra di SEÑOR a yega na djé, bisando: ‘Lanta, bai Sarepta, ku ta pertenesé na Sidon, i keda ayanan; mira, ayanan Mi a duna un biuda òrdu pa dunabo di kome.’ Asina el a lanta i a bai Sarepta, i ora ku el a yega na porta di e stat, mira, tabatin un biuda einan ta piki palu; i el a yam’é i a bisa: ‘Pa fabor, buska poko awa den un butishi pa mi, pa mi bebe.’ I ora ku e tabata bai kohe esaki, el a yam’é i a bisa: ‘Pa fabor, trese pida pan pa mi den bo man.’ Ma el a bisa: ‘Manera SEÑOR bo Dios ta biba, mi no tin pan, solamente un man di hariña den e kòmchi i un tiki zeta den e butishi; i mira, mi ta piki algun pida palu pa mi bai paden i prepar’é pa mi ku mi yu hòmber, pa nos kom’é i muri.’ E ora ei Elias a bis’é: ‘No tene miedu; bai, hasi manera bo a bisa, ma traha un pan buskuchi chikitu for di djé pa mi promé, i tres’é pa mi; i despues bo por traha un pa bo mes i pa bo yu hòmber. Pasobra asina e SEÑOR Dios di Israel ta bisa: ‘E kòmchi di hariña lo no bira bashí, ni e butishi di zeta lo no bira bashí, te dia ku SEÑOR manda awaseru riba e superfisio di tera.” Asina el a bai i a hasi konforme e palabra di Elias; i é ku Elias i e hendenan di su kas a kome pa hopi dia. E kòmchi di hariña no a bira bashí ni e butishi di zeta no a bira bashí, konforme e palabra di SEÑOR ku El a papia pa medio di Elias.” 1 Reinan 17:7-15.
E biuda aki tabata tin su yu na promé lugá i Elias a bis’é e palabranan sitá ariba; pero e no a bis’é esaki pasó e tabata tin hamber òf pasó e tabata golos, pero sí pa e biuda sá ku na promé lugá no ta su yu e mester tin, sino Dios.
Nos ta den nos Hoguera Santu di Isreal, ku ta bai ta na e Seru Karmel na Isreal. Kada persona ta bai tin e oportunidat di yega serka Dios ku su fe i demostrá Dios ku ta E ta nos Dios i E ta na promé lugá den nos bida.
Yega i subi altar i kue bo envelòp ku e blachi di petishon i skibi e sekura ku bo ke pa Dios kaba, loke bo ke pa Dios kambia, e milager ku bo ke pa sosodé den bo bida! Pone bo mihó entrega i mi tin sigur ku Dios lo mira bo sekura i lo laga riunan di Awa Bibu i dushi basha ofer!
