E Santu Skritura ta registrá ku Hana tabata un muhé afligí dor di su inkapasidat pa haña yu i humiá pa e otro kasá di su kasá Elkana. Su tristesa tabata asina profundo ku ni e amor di su kasá por a konsol’é. Pa e motibu aki, e la bai na e Tabernakel i a perseverá den orashon (1 Samuel 1:10-18).

Su lipnan tabata move, pero su stèm no a wòrdu skuchá, pasobra su orashon tabata bini di kurason. Ora e saserdote Eli a puntr’é tokante di ta burachi, el a kontestá:

“… Nò, mi shon, no ta asina. No ta biña ni ningún bibida stèrki mi a bebe, ma mi ta sinti un peso na mi kurason i mi ta deshogando mi pena dilanti di Señor” (1 Samuel 1:15).

Di e mesun manera, pa nos optené e fabor di Dios, nos mester drama nos alma dilanti di djE.

E problema ta ku hopi hende ta kere ku dor di hasi orashon i puntra hopi, nan lo wòrdu kontestá mas lihé, ora ku en realidat, Dios no ta mira e kantidat di palabra ku nos ta bisa òf e gritu ku nos ta hasi, sino mas bien e sinseridat ku nos ta mustra dilanti di djE.

Ora bo ta sinsero, Dios ta respondé inmediatamente, dunando bo fe, siguridat i kurashi pa determiná ku, for di e momentu ei, kosnan lo kambia. Despues, lágrimanan ta wòrdu remplasá pa pas den bo alma.

Ora bo bai un lugá reservá i pone bo alma na pia di Señor Hesus, asta si e situashon sigui ta malu di pafó, bo interior ta kambia.

Kisas bo ta na fondo di e pos i na e límite di bo sufrimentu. Despues, dobla bo rudia i papia ku Dios sinseramente, eksponiendo bo erornan, frakasonan i debilidatnan. Solamente É lo tende e kehamentu di bo alma i baha riba bo, proveyendo bo ku e siguransa i siguridat ku e kontesta ta na kaminda.