Nos mester, diariamente, hasi un reflekshon tokante nos aktitunan – loke ta referí na nos relashon ku e personanan ku ta rondoná nos, na kas, na trabou, na skol, den iglesia, en fin, na e lugánan ku nos ta frekuentá, independientemente di nos posishon sosial òf nos posishon den iglesia – pa nos mira si nos ta ehersé e berdadero kristianismo, pues ta hopi komun pa nos wak esaki na prinsipio di e konvershon, pero e práktika di kristianismo nunka ta sali for di esnan ku a nasé di Dios.
Humildat, por ehèmpel, ta e base di e karakter di Dios i di esnan ku a nase di djÉ. Di otro banda, e orguyo ta e base di e karakter di e diabel i di esnan nasé di karni. Opservá ku e orguyo a nase promé ku mundu a eksistí, pues e la nase den shelu i a logra destruí Lusifèr i terser parti di e angelnan di shelu, transformandonan den demoño. Pa su parti, humildat tabata e promé enseñansa ku Señor Hesus a preokupá pa duna na Su disípulonan i e pueblo, ora E la kuminsá Su ministerio riba tera:
“Felis esnan humilde di kurason; reino di shelu ta pa nan.”
Mateo 5:3
Si ta e diabel tabata siña, lo e la bisa: “Infelis e orguyosonan di spiritu, pasobra e reino di skuridat ta di nan.”
Señor Hesus no solamente a siña, sino a duna ehèmpel:“… Nò, El a pone esei un banda, El a bira meskos ku un katibu, i a bira igual na hende. I ora El a aparesé komo hende, El a humiliá su mes i a bira obedesidu te na morto, sí, morto na krus.”
Filipensenan 2:7-8
Nos konosé hopi hòmber i muhé ku un tempu tabata un eksponente den man di Dios; lidernan ku tabata hasi e diferensia i ku a gana hopi alma den e mundu akí, i nan a kai, pasobra nan no a vigilá i a laga e orguyo drenta den nan kurason, òf nunka nan a nase di Dios, i p’esei, e orguyo tabata skondí i a manifestá den e momento di e mayó kresementu di nan ministerio – i den mayoría di nan, esaki tabata evidente den e manera arogante, prepotente i pedante di trata nan subordinadonan chikitu.
¡Atenshon! No ta importá si ta trata de un miembro, un obrero, un pastor, un kasá di pastor, un obispu òf un kasá di obispu, si bo tin humildat den bo spiritu, speshalmente den tratamentu di personanan ku ta rondó di bo; ke men, si bo ta un persona ku ta trata otro hende malu, kere ku bo ta superior ku nan, e spiritu ei no ta bini di Dios. Kuidou! Wak loke e Eskrituranan ta bisa:
“Tras di orguyo ta bini frakaso; pa risibí honor, mester ta humilde promé.”
Proverbionan 18:12
I nos, obreronan, miembronan, pastor, kasá di pastor, obispu i kasánan di obispu? Nos ta tratando e hendenan rondó di nos ku humildat òf ku orguyo den nos kurason, keriendo ku nos ta superior ku nan?
Laga nos pensa.
Dios bendishoná boso.
