Siguramente Dios ta bon pa Israel, pa esnan ku ta di kurason puru! Ma pa loke t’ami, mi pia a hera di trompeká; parumpinga mi pasonan a slep. Pasobra mi tabata envidioso di e arogantenan, ora mi a mira e prosperidat di e malbadonan.
Salmonan 73:1-3
Asaf, e outor di e salmo aki i di vários otro salmo, tabata un levita, eskritor, kantante, músiko i profeta ku a dirigí adorashon den e tabernakel durante e tempu di Rei David. Ku otro palabra, ya kaba e tabata un hòmber di bastante éksito komo sirbidó di Dios. Sin embargo, na un dado momento den su bida, Asaf a konfrontá un gran konflikto interno ora el a pèrdè enfoke riba sirbi Dios i a kuminsá ripará kon algun hende malbado tabatin éksito.
Mira, esakinan ta e malbadonan, ku semper ta trankil; nan rikesa ta oumentá. Siguramente ta en bano mi a tene mi kurason puru, i a laba mi mannan den inosensia; pasobra henter dia mi a wòrdu afligí, i tur mainta mi a wòrdu kastigá. Si mi a bisa: ‘Lo mi papia asina’, mira, lo mi a traishoná e generashon di Bo yunan. Ora mi a purba komprendé esaki, el a resultá masha trabahoso pa mi,
Salmonan 73:12-16
Envidia di e prosperidat i éksito di otro hende tambe a mancha kurason i wowo di hopi kristian. I envidia, manera un bakteria mortal, ta hasi e fe i bida spiritual di e hendenan aki malu. Nan ta sinti nan mes frustrá i amargá; Hopi bia nan ta keha tokante nan mes bida i ta kritiká esnan ku nan ta envidiá. Nan ta kuminsá sinti nan mes malu, víktima di otronan ku “nunka no a yuda nan” – i asta di Dios, ku “a deskonsiderá” tur nan sirbishi i puresa di kurason.
De echo, ta tentativo pa kompará nos mes ku otronan i husga nos mes komo mas meresé ku nan, spesialmente ora nos ta kana rekto, traha duru, etc. Aparentemente nò. “Inhustisia!” “Pasobra?” “Mi ta hasi tur kos bon!” “Dikon e i no ami?”
E sintimentu ei a kontaminá Asaf su kurason i kasi a bah’é abou.
“Tempu ku mi kurason tabata yen di amargura, i mi tabata kunsumí te den mi higra, mi tabata bobo i ignorante; mi tabata manera un bestia Bo dilanti.”
Salmonan 73:21-22
“te ora ku mi a drenta den e santuario di Dios; e ora ei mi a bin komprendé nan fin.”
Salmonan 73:17
Aki ta wòrdu impliká ku Asaf a pasa banda di e altar di Dios promé ku e drenta e santuario, manera tabata kustumber den e sirbishi di tabernakel. I hasiendo esei, el a logra laga e mal sintimentunan i pensamentunan ei na altar; El a tende e bos di Dios, ku a aklará tur kos p’e. Pues, el a laga e karga emoshonal ei bai, a wòrdu kurá, i a rekobrá komunion ku Dios.
E kristian ku ke defendé su fe di envidia,Yalurs i doló pa éksito di otronan, mester hasi e ehersisio aki konstantemente: no wak bida di otronan, sea ku nan ta rumannan den iglesia òf inkrédulo den mundu; Nunka kompará bo mes ku niun hende, ni anhelá e testimonio di otronan; I si envidia ta surgi ainda, hib’é mesora na altar, lag’é dilanti di Dios, i debolbé e enfoke na bo mes bida.
_________________________________
1 Krónikanan 6:31, 32, 39; 2 Krónikanan 29:30
