Bondat ta hopi similar na benignidat; p’esei, un persona bondadoso tin un komportashon generoso i indulgente ku otronan, esta, ta pordoná.
E persona ku tin e birtut akí, na momento di yuda i hasi e forsa di amor bal, e no ta midi e sakrifisionan. Nos por mira un ehèmpel di Bondat den e parábola di e bon samaritano…
“Hesus a kontest’é: Un dia tabatin un hòmber ku a baha for di Herusalèm bai Yériko. El a kai den man di bandido; nan a kita tur kos for di dje, dun’é un halá di sota i bai lag’é kasi morto bentá abou. Awor a sosodé ku un saserdote tabata baha p’e mesun kaminda. Ora el a mira e hòmber, el a krusa kaminda pasa bai laga e hòmber. Un levita tambe a yega na e lugá ei, mira e hòmber; krusa kaminda pasa bai lag’é. Ma un samaritano, ku tabata biaha, a yega kaminda e tabata. Ora el a mir’é, el a haña duele di dje. El a bai serka e hòmber, hunta su heridanan ku zeta i biña i mara nan. El a pone e hòmber riba su bestia di karga, hib’é un posada i kuid’é. Su manisé, e samaritano a saka dos moneda di plata duna e doño di posada. El a pidié: Kuid’é i si bo tin mas gastu kuné, mi ta paga bo esei ora mi bini bèk.” Lukas 10:30-35
E persona bondadosa ta suave i dushi; e no ta wak su mes i muchu mas spera rekompensa di parti otro. Kontrali, e no ta wak koló, sekso, beyesa òf situashon ekonómiko di otro, paso su plaser ta glorifiká Señor Hesus pa medio di su aktonan di generosidat.
“E obranan di karni i e Fruta di Spiritu ” – Obispo Macedo
