Organisashon Mundial di Salú ta definí intimidashon komo “e intimidashon físiko òf sikológiko na kua un studiante ta wòrdu sometí kontinuamente dor di su kompañeronan.”
Miéntras ku e problema aki ta wòrdu asosiá ku infansia, e ta sosodé tambe den edat adulto. Den e kaso aki, e ta konosí komo “mobbing.” Segun e Organisashon Internashonal di Trabou (ILO), e ta “kualke akshon verbal òf sikológiko ku ta wòrdu hasí sistemátikamente i persistentemente pa humiá, ofendé òf intimidá un persona na pia di trabou.”
E ta bira visibel pa medio di humiashonnan, eksklushon, burla konstante, manipulashon emoshonal, òf abusu di poder. Tin biaha e ta disfrasá komo “chiste.” E konsekuensianan ta: ansiedat, outo-estima abou, isolashon i asta depreshon.
SU TRAS, UN PROBLEMA SPIRITUAL
E perpetradó ta eksperensiando un konflikto i ta wòrdu engañá pa maldat, keriendo ku hasi daño na otronan lo yuda aliviá su doló. Mirando e situashon aki, ta importante pa kibra e siklo.
Beibel ta bisa: “No laga maldat vense boso, pero vense maldat ku loke ta bon” (Romanonan 12:21).
Esaki ta nifiká ku si abo ta e persona ku ta intimidá otronan, bo mester ta honesto, rekonosé bo komportashon, pidi Dios i e persona ku bo a ofendé pordon, i buska yudansa pa bandoná e komportashon ei.
TEMPU PA AKTUA
Si bo ta un víktima di intimidashon, no tuma vengansa den natura. Konta un hende kiko ta pasando, pidi yudansa pa superá e situashon aki, i resa pa esnan ku a hasi bo doló pa nan kambia nan manera di biba.
Si bo konosé un hende ku ta eksperensiando esaki, no keda ketu, pasobra e aktitut ei ta yuda perpetuá e daño. Bisa un hende kiko ta pasando i resa pa esnan enbolbí. Pa vense maldat, bo mester hasi bon.
Ta importante pa kòrda ku tin tres víktima: esnan ku ta sufri, esnan ku ta hasié, i esnan ku ta wak sin hasi nada al respekto. Tur hende, di algun manera, ta víktima di miedu, outo-estima abou, sintimentunan di rechaso, silensio i abandono, entre otro kosnan.
Fomentá un kultura di rèspèt, kaminda kada individuo ta sintié balorá i sigur, ta e promé paso. Nos tur tin un ròl importante pa hunga den esaki.
